|
|
|
|
|
|
|
|
|
| 2019 թ. նոյեմբերի 1-ին ՀՀ ԳԱԱ Արևելագիտության ինստիտուտում տեղի ունեցավ «Մերձավոր Արևելք. նոր միտումներ և հեռանկարներ»... |
|
|
|
|
2019 թ. նոյեմբերի 1-ին ՀՀ ԳԱԱ Արևելագիտության ինստիտուտում տեղի ունեցավ «Մերձավոր Արևելք. նոր միտումներ և հեռանկարներ» գիտաժողովը՝ նվիրված խորհրդային և ռուս ականավոր արևելագետ, դիվանագետ ու պետական գործիչ Եվգենի Մաքսիմի Պրիմակովի (1929-2015) 90-ամյակին: Գիտաժողովը կազմակերպել են ՀՀ ԳԱԱ Արևելագիտության ինստիտուտը ԵՊՀ Արևելագիտության ֆակուլտետի հետ համատեղ, ՀՀ-ում ՌԴ դեսպանատան և Երևանում Ռուսաստանի գիտության և մշակույթի կենտրոնի աջակցությամբ:
Գիտաժողովը ողջույնի խոսքով բացեց ՀՀ ԳԱԱ ԱԻ տնօրեն Ռուբեն Սաֆրաստյանը: Նա նշեց, որ Ե. Պրիմակովը գիտական մեծ ժառանգություն է թողել, կյանքի վերջին տարիներին զբաղվում էր Մերձավոր Արևելքում քաղաքական իրավիճակի ուսումնասիրությամբ: «Այս միջոցառումը գալիս է լրացնելու բացը, որն ունի երիտասարդ արևելագետների սերունդը Ե. Պրիմակովի գործունեության մասին», - նշեց Ռ. Սաֆրաստյանը:
ՀՀ-ում ՌԴ Արտակարգ և լիազոր դեսպան Սերգեյ Կոպիրկինը նշեց, որ Պրիմակովն ականավոր գիտնական, պետական գործիչ, դիվանագետ էր: Նա կանխատեսել էր աշխարհակարգի զարգացման առանցքային միտումները և շատ բան է արել, որ այդ գործընթացները դրական հունով ընթանան:
ՀՀ ԳԱԱ Հայագիտության և հասարակական գիտությունների բաժանմունքի ակադեմիկոս-քարտուղար Յուրի Սուվարյանն իր ելույթում նշեց, որ գիտաժողովին քննարկվող թեմատիկան արդիական է տարածաշրջանի և ամբողջ աշխարհի համար: Անդրադառնալով Պրիմակովի գործունեությանը՝ Սուվարյանն ընդգծեց, որ նա խոշոր դիվանագետ էր և արևելագետ:
ՀՀ Ազգային ժողովի պատգամավոր Գոռ Գևորգյանն ընդգծեց, որ գիտաժողովը ոչ միայն հարգանքի տուրք է Ե. Պրիմակովի հիշատակին, այլ նաև քննարկում արդի մարտահրավերների շուրջ:
ՀՀ արտաքին գործերի նախարարի տեղակալ Գրիգոր Հովհաննիսյանը նշեց, որ Ե. Պրիմակովը փայլուն դիվանագետ և գիտնական էր, մեծ ներդրում և ավանդ է ունեցել խորհրդային արևելագիտության զարգացման գործում: Հովհաննիսյանը հիշեցրեց նաև Պրիմակովի ջանքերն արցախյան խնդրի խաղաղ կարգավորման ուղղությամբ:
ԵՊՀ Արևելագիտության ֆակուլտետի դեկան Ռուբեն Մելքոնյանն իր խոսքում նշեց, որ հայ և ռուս արևելագետներին միավորող գործոններից մեկը Պրիմակովն էր: Նա տաղանդավոր դիվանագետ, փայլուն գիտնական էր, իսկ նրա աշխատություններն օգտագործվում են Երևանի պետական համալսարանում դասավանդման համար:
Գիտաժողովին զեկուցումներով հանդես եկան Երևանում Ռուսաստանի գիտության և մշակույթի կենտրոնի ղեկավար Սերգեյ Ռիբինսկին, որը ներկայացրեց Պրիմակովի կյանքն ու գործունեությունը, ՀՀ ԳԱԱ Արևելագիտության ինստիտուտի գիտաշխատողներ Նազելի Նավասարդյանը («Անվտանգության համակարգերի կերպափոխումները Կասպից ծովում և ռուս-իրանական հարաբերությունները») և Մուշեղ Ղահրիյանը («Քաղաքական վարչակարգերի կերպափոխումները Մերձավոր Արևելքի և Հյուսիսային Աֆրիկայի արաբական երկրներում»):
|
|
|
|
|
|
|
|
|
|
|
