ՀՀ ԳԱԱ արևելագիտության ինստիտուտի Թուրքիայի բաժնի վարիչ, պ.գ.թ., դոցենտ Լևոն Հովսեփյանը Չինաստանի հասարակական գիտությունների ակադեմիայի Ռուսաստանի, Արևելյան Եվրոպայի և Կենտրոնական Ասիայի ուսումնասիրությունների ինստիտուտի հրավերով մասնակցել է ս/թ նոյեմբերի 18-19-ը Պեկինում անցկացված «Գոտի-ճանապարհ նախաձեռնության բարձր որակի զարգացում. հայեցակարգեր և գործողություններ» խորագրով միջազգային գիտաժողովին։ «Կառուցելով կամուրջներ գիտության ու տեխնոլոգիայի միջոցով. Գիտության դիվանագիտությունը Գոտի-ճանապարհ նախաձեռնության շրջանակում (նարատիվներ և պրակտիկա)» վերտառությամբ զեկույցում անդրադարձ է կատարվել Չինաստանի «Գոտի-ճանապարհ» (BRI) նախաձեռնության շրջանակում գիտական դիվանագիտության դերին՝ դիտարկելով այն որպես բազմաչափ գործիք գլոբալ ներգրավվածության և համագործակցային կայունարար նարատիվների ձևավորման համար։ Զեկույցի շրջանակում ներկայացվել են նաև գիտության դիվանագիտության համատեքստում Հայաստան-Չինաստան համագործակցության հնարավորություններն ու հեռանկարները։