Ռուբեն Արամի Սաֆրաստյան, թուրքագետ
Ծնվել է 1955թ. Երևանում, 1977թ. ավարտել է Երևանի պետական համալսարանի արևելագիտության ֆակուլտետի թուրքագիտության բաժինը և 1980թ.` Հայաստանի ԳԱԱ Արևելագիտության ինստիտուտի ասպիրանտուրան:
1981թ. աշխատանքի է անցել Հայաստանի ԳԱԱ Արևելագիտության ինստիտուտում, եղել է կրտսեր, հետագայում` ավագ և առաջատար գիտաշխատող, Թուրքիայի ուսումնասիրման գիտական խմբի ղեկավար և Թուրքիայի բաժնի վարիչ: 1988 - 1991թթ. եղել է նաև Հայաստանի ԳԱԱ Սփյուռքի ուսումնասիրման բաժնի վարիչի տեղակալ: 2006թ. ՀՀ ԳԱԱ Արևելագիտության ինստիտուտի տնօրենն է:
1983թ. համատեղության կարգով գիտամանկավարժական աշխատանք է տարել Երևանի բարձրագույն ուսումնական հաստատություններում (Պետական համալսարան, Հայկական մանկավարժական ինստիտուտ, Գեղարվեստա-թատերական ինստիտուտ, Աճառյան համալսարան):
Ունի նաև պետական կառավարման բարձրագույն մարմիններում քաղաքագետ-վերլուծաբանի աշխատանքի փորձառություն. 1991-1992թթ. եղել է Հայաստանի Գերագույն Խորհրդի միջազգային հարաբերությունների գծով ավագ փորձագետ, 1992-1996թթ.՝ ՀՀ նախագահի աշխատակազմի վերլուծական բաժնի վարիչի տեղակալ:
1996-1997թթ. վարել է դիվանագիտական աշխատանք Գերմանիայում՝ աշխատելով Բոննում ՀՀ դեսպանատան խորհրդական:
1999թ. հաղթել է Հումբոլդտի անվան (Գերմանիա) միջազգային գիտական մրցույթում և մեկ տարի հետազոտական աշխատանք է վարել Գերմանիայի Բոխում քաղաքի համալսարանում:
2001թ. հաղթել է Ֆուլբրայթի անվան (ԱՄՆ) միջազգային գիտական մրցույթում և մեկ տարի գիտական պրպտումներ է կատարել Կալիֆորնիայի Բըրքլի համալսարանում:
2002թ. հաղթել է Կենտրոնական Եվրոպական Համալսարանի (Բուդապեշտ, Հունգարիա) կողմից հայտարարված միջազգային քաղաքականության ուսումնասիրման գիտական մրցույթում և մեկ տարի գիտական ուսումնասիրություններ է կատարել նույն համալսարանի Քաղաքականության ուսումնասիրման կենտրոնում:
2008թ. պարգևատրվել է “Մովսես Խորենացի” մեդալով:
Պատմական գիտությունների թեկնածու (1983թ.), դոցենտ (1992թ.), պրոֆեսոր (2007թ.), պատմական գիտությունների դոկտոր է(2009թ.):